www.zingg-satire.ch
hans Jürg Zingg (*1944)
Kabarettist - Liedermacher - Slampoet - Autor
Im Februar 2023 erschien mein spouken wöörd roman
tüet nid zwüescht
im Berner Neptun-Verlag
E Liebesgschicht us de früeche Sächzger u glychzytig e Biudigsroman. Schül, dr Leererssuun us dr Chlyschtadt am Thunersee, vrliebt sech i ds Änni, es Bäärgpuremeitli us em Oberland. Beidi gö i Gymer, sii nimmt Änglisch, äär Griechisch; beidi sy interessiert a Kunscht, hei aber dertdüre ds Höi absolut nid uf dr glyche Büni; beidi hei Fröid ar Musig, singe gäärn; aber äär lost mee Jazz, sii mee Klassisch. Sii isch es usgschproches Klaviertalänt, äär schtümperet uf der Bratsche u chouft sech de irgendeinisch e Chnebu, es Klarinett. U taatsächlech glingt mit dr Zyt sogaar es eifachs Zämeschpiil. Gnaau glych geits ne de o mit der Liebi: nach den eerschte Funke ds eerschte Füür, u de scho gly der eerscht Dämpfer. Aber nid naalaa gwinnt! Oder ächt doch niid? Das Uuf u Ab zwüsche Glück u Seeleschmätter macht di Gschicht vo re Gymerliebi zu öppis ganz Bsunderem. U wi si ufhört, wiird hie nid vrraate.
schül
schtöört s di wen i hie näb dii sitze
änni
we d nu lang so tumm fraagscht jaa
drum hock entlig aab
schüls blick
wanderet itze zum änni überen u die
luegt zrügg u winkt ne häre wiischt waas
seit si haublut won er vor e re schteit
wier ziichnen enanderen aab zeerscht duu miig
u näär iig diig
schül weis das er ke schlächte zeichner isch
u bi ännis voorschlaag wiird s im heiss vor fröid
aber trotzdäm seit er
u du meinsch das chöm guet
was het schwarz gsiit – e muetproob
schül schlückt läär u seit komentaarloos
auso de schtand häre – oder wosch hocke
u schämt sech e chlei
für sy aafluug vo feigheit
«Vergleichbares habe ich in der Mundartliteratur bis heute noch nicht gelesen.»
Christian Schmid